Liman D. Gegaj

Liman Gegaj (30.10.1965-19.07.1997) ishte ushtar i Ushtrisë Çlirimtare të Kosovës, i cili aktivitetin e tij e nisi qysh në rini. Limani i thoshte nënës së tij, Zades “Se duhet të jetë krenare nëse djali i vritet për lirinë e Kosovës”.

• Jeta dhe familja

Limani u lind në fshatin Fshati i Ri (ish-Novosellë). Ishte biri i Destanit dhe Zades, kurse familja e tij ishte një familje e varfër fshatare, por tipike malësore, e njohur dhe e respektuar për bujari dhe atdhedashuri.

Shkollën fillore e kreu në vendlindje, kurse të mesmen në Gjimnazin “Luigj Gurakuqi”, të Kijevës, me sukses shembullor, për ta përfunduar në “Jeta e re”, në Suharekë, si automekanik, që sa më parë të punësohej dhe t`i ndihmonte familjes.

Pas përfundimit të shkolles së mesme, zuri punë ně organizatën “Mirusha”, në Malishevë, ku u dallua si punëtor i zellshëm dhe i respektuar nga gjithë kolektivi.

Në vitin 1981 ishte pjesëmarrës aktiv në demonstrata, që ia lëkundën themelet ish-Jugosllavisë, ndërsa pas protestave të vitit 89/90, i larguar nga puna, mori rrugën e mërgimit për të ndihmuar familjen.

Limani në vitin 1992 u martua me Naile Krasniqin nga Drenoci dhe sollen në jetë dy djem, Petritin dhe Astritin.

• Veprimtaria

Në vitin 1997, Limani ishte kthyer nga mërgimi dhe priste vetëm momentin që te kyçej në UÇK, e cila ndërmerrte aksione tejet të suksesshme kundër policisë serbe dhe bashkëpunëtorëve të saj.

Limani kishte simpati të jashtëzakonshme për ushtrinë tonë dhe për djemtë e vashat tona, që kishin rrokur armët për të luftuar për liri. Dëshira e zjarrtë e Limanit për t`iu bashkëngjitur luftetarëve të lirisë u realizua në qershor të vitit 1998, pikërisht, ně njësitet e komandant Fatmir Limaj – Çelikut.

Duke qenë se në atë kohë ndihej nevoja për furnizim me armë, Limani me shumë mund e sakrificë, me disa shokë, arriti ta kalonte kufirin shqiptaro-shqiptar, për t’u kthyer më l7 korrik 1998, në ditën kur filloi beteja për Rahovecin.

• Rënia heroike

Më 19 korrik 1998, Limani së bashku me Sadik Shalën, Abdyl Gegajn, Brahim dhe Fatmir Zogajn, shkuan në fushëbetejën e Rahovecit atje ku zhvillohej një luftë e pabarabartë, por tejet heroike e UÇK-së. Pikërisht në këtë datë, një plumb i armikut e godet Limanin dhe shokun e tij Sadik Shalën, dhe kështu, së bashku kishin rënë në fushën e nderit, për të mos vdekur kurrë.

• Pas rënies heroike së Liman Gegaj

Trupi i Limanit nuk u gjet kurrë as sot e kësaj dite, ndërsa varri i tij dhe emri janë në Varrezat e Dëshmorëve, në fshatin Kleçkë.

Emrin e Limanit e mori një batalion i Brigadës 121.

Për të nderuar veprën e tij heroike, familja e Liman Gegaj mori mirënjohje nga Organizata e veteranëve të luftës.