Bafti T. Buçaj

Bafti Buçaj (29.02.1956-31.05.1999) ishte luftëtar i Ushtrisë Çlirimtare të Kosovës, i cili qysh si fëmijë ishte rritur me ndjenjën e dashurisë atdhetare.

• Jeta dhe familja

Bafti Buçaj u lind më 29 shkurt të vitit 1956, në Lladroc të Malishevës, nga babai Tafili dhe nëna Xhemilja.

Prindërit e tij kishin edhe shtatë fëmijë të tjerë, Milaimin, Agronin, Elmiun, Lumturien, Kimeten, Shahën dhe Kadën.

Ai shkollën fillore e përfundoi në vendlindje, ndërkaq të mesmen në qytetin e Therandës (ish-Suharekë).

Dëshmori Bafti Buçaj ka lënë pas vetes bashkëshorten Metullahen, djalin Visarin dhe vajzat, Malësoren e Gentën.

Për shkak të gjendjes së rënduar ekonomike të familjes, si edhe gjendjes me të cilin po përballeshin shqiptarët brenda regjimit jugosllav, Baftiu si edhe shumë të rinj kishte marrë rrugën e mërgimit, me ç’rast kishte shkuar në Slloveni, ku kishte punuar dhe jetuar për katër vite.

Gjatë viteve 1985-1992, Baftiu punoi në organizatën bujqësore “Mirusha”, të Malishevës, e më pas punoi edhe në shkollë si roje. Më pas, Baftiu ishte aktiv në çdo protestë e demonstrateë që po zhvillohej kundër heqjes së autonomisë së Kosovës.

• Veprimtaria

Fillimi i luftës në Drenicë shënon edhe fillimin e angazhimit të Baftiut në Ushtrinë Çlirimtare të Kosovës, i cili nisi angazhimin e tij së pari në sektorin e logjistikës, për të siguruar ushqim, strehim e veshmbathje për popullatën civile shqiptare, të cilët ishin shpërngulur nga shtëpitë e tyre si pasojë e luftimeve.

Më pas, me themelimin e pikës së luftimeve në fshatin Lladroc, ai menjëherë u angazhua në kompaninë II, “Ali Zogaj”, që funksiononte në kuadër të Batalionit IV, të Brigadës 121, “Ismet Jashari – Kumanova”.

Ai kishte marrë pjesë në shumë beteja dhe luftime kundër forcave serbe, përfshirë edhe luftimet e ashpra të zhvilluara në Grykën e Llapushnikut, e më pas edhe në fshatin Luzhnicë, në gusht të vitit 1998, ku tregoi një heroizëm dhe trimëri të paparë në ditët më të vështira për kombin dhe popullin shqiptar.

• Rënia heroike

Më 31 maj të vitit 1999, duke filluar nga orët e para të mëngjesit, forcat armike serbe kishin ndërmarrë ofensivë të përmasava të gjera, në drejtim të fshatit Lladroc.

Në vendin e quajtur “Bregu i Memës”, kishin zënë pozicionet Bafti Buçaj e Avni Buçaj, së bashku me 18 bashkëluftëtarë të tjerë nga Lladroci. Derisa granatimet dhe bombardimet e armikut nuk kishin të ndalur, diku rreth orës 13:30, Baftiu dhe Avniukishin vrapuar për te shtëpia e Muart Buçajt, për të marrë municion dhe kur i afrohen 50m pikës së pozicioneve të luftëtarëve të lirisë, ata ishin goditur nga predhat e minahedhësit të armikut.

Edhe përkundër përpjekjeve të bashkëluftëtarëve për t’i shpëtuar, çdo gjë ishte e kotë dhe ata ranë në altarin e lirisë.

Pas çlirimit të Kosovës, trupi i Baftiut ishte rivarrosur në Kompleksin e Varrezave të Dëshmorëve në Kleçkë.

• Pas rënies heroike të Baftiut

Për të nderuar veprën dhe guximin e tij, familja e dëshmorit Bafti Buçaj ka marrë mirënjohje nga Qeveria e Kosovës e asaj kohe, si dhe nga shoqatat e dalura nga lufta.

Një rrugë në fshatin Lladroc të Malishevës mban emrin e tij.

Në dhjetor të vitit 2023, me një pjesëmarrje të madhe të qytetarëve të Malishevës dhe institucioneve komunale, u bë përurimi i lapidarëve në fshatin e tyre të lindjes për tre dëshmorët e kombit, Bafti Buçaj, Avni Buçaj dhe Feriz Bibaj.